紫荊黨創辦人之一、總裁黃秋智不時有出位言論，好似佢早排撐梁振英嘅郊野公園建屋大計，仲叫用人大釋法搞掂法律問題，但梁振英就唔領情，仲話根本唔使釋法，立法會已可搞掂，搞到黃秋智要向梁致歉，不過原來黃日前已辭去紫荊黨總裁一職，亦唔會再擔任該黨發言人。
《頭條日報》噚日報道，紫荊黨上周五召開黨員大會，黃秋智以個人原因提出辭任總裁，但冇提及會否退黨，佢噚日接受NOW新聞台查詢，證實已辭紫荊黨總裁同發言人嘅事，但就強調至今冇退黨，會繼續支持紫荊黨為港人服務。
紫荊黨執委伍俊飛接受網媒「香港01」查詢時代表紫荊黨回應，話對黃秋智辭任總裁表示理解，亦感謝佢對黨嘅事業有突出貢獻，仲話黃秋智只係退出領導層，仲係黨員。至於黃秋智喺紫荊黨工作又點？伍俊飛話佢會接手黃秋智嘅公關同媒體工作，至於總裁個位暫由主席李山兼任。
咁黃秋智因乜要以「個人原因」退出領道層？政圈眾說紛紜，有傳或者同佢哋個黨喺Instagram呼籲網民估吓梁振英會否選下屆特首嘅抽獎活動有關，當時有幾百人參與討論，仲話獎品包括「高質蛇齋餅糭」嘅PS5、Switch等遊戲機有關，而佢哋事後亦已刪咗個帖。
李八方