朱凱廸一向畀人感覺係白淨書生型，連長毛梁國雄都成日叫佢做廸廸仔，點知原來昔日嘅廸廸仔，𠵱家已經變成黑黑實實嘅阿廸！
前立法會議員邵家臻喺佢嘅fb同石牆花專頁發文，話佢噚日同另一前立法會議員張超雄，去赤柱探被拘押嘅朱凱廸時，朱凱廸先係一輪問候，之後就不斷問候身處其他院所嘅朋友，好似毛哥、吳敏兒、何桂藍、何俊仁嘅情況，又問候同在赤柱還押但見不到面嘅郭家麒、李嘉達同楊森點情況。
阿廸建議，叫佢哋不妨睇吓有助自己平靜嘅靜修書，畢竟監房難捱，畀自己心靜一點確係好事，佢自己就正在讀一啲歷史書，了解中共歷史同反右運動嘅始末。佢亦努力適應坐監生活，每日用盡放風一個鐘曬太陽，希望等皮膚再黑一啲，預備由還柙人士轉為定罪人士嘅身份。
至於邵家臻關心嘅監房酷熱問題，阿廸已具體地感覺到懲教署正在做嘢，好似三樓嘅倉亦都加裝滾筒扇。邵家臻話總體嚟講，赤柱嘅酷熱問題稍有改善，仲話唔該晒懲教署。
李八方