資深演員游飈自2012年離開無綫後，決定轉行做老闆開設環境工程公司。他昨日在沙田出席就業博覽活動，坦言要專注自己的生意，所以難以兼顧拍戲，他說：「好多工程要去跟嘅時候，其實對拍戲係有困難，但你問我想唔想拍戲，梗係想啦，不過唔好再做賊囉，做得太多真係唔得，強姦得多你都厭啦，唔係我冇演員道德，而係撈咗30幾年都係咁，個心好攰。」
游飈指由演員轉營做生意，過程中要面對不少困難，他說：「好多人以為我哋掛住演員面口做生意好容易，其實反而更加差，啲人覺得『你做戲㗎喎，你識做生意？』變咗打擊好大，你需要花更多力氣去證明畀人睇，老闆唔容易做。」