現年38歲的伍偉樂當年有「亞視霆鋒」的稱號，2015年與圈外女友阿Mi結婚，現育有六歲長子、四歲次子及一對兩歲半的龍鳳胎。伍偉樂18歲時加入亞視，做到2016年亞視「熄機」，去年轉行揸巴士，腳踏實地工作養起一家六口。今個父親節，他事先表明沒有任何慶祝活動，在訪問當日清晨四時多已經開工，踩足10個鐘，其駕駛的13M號車終在牛頭角巴士總站埋站。伍偉樂穿着有點殘舊的車長制服，拿着一個卡通公仔的愛心飯盒收工回家。
伍偉樂跟太太四年抱四，問到他會否再生？他爽快說：「我紮咗啦，太太入過醫院咁多次，咁我做過啲乜呀？淨係擺啲嘢入去，唔可以咁，所以我做結紮手術。」伍偉樂每月人工幾乎全花光在生活上，談到據聞有四個子女可領取高達二萬多元的綜援，他即說：「聽講有埋父母有三萬幾蚊，我𠵱家份工做到就嚟死都冇綜援咁高，但老婆講得啱，要腳踏實地去做人。」
