【HAPPY FATHER’S DAY】一向形象搞笑，口才了得的梁志健（森美），除了是電台節目主持及在幕前多線發展外，相信大家都記得他是一位緊張爸爸，對於家中18歲的大仔、15歲的囡囡及嬌妻Veronica愛護有加。後日便是父親節，森美接受《蘋果》訪問表示，雖然囝囝現仍在港接受檢疫隔離，未能趕及於父親節一家團聚，但他與太太依然十分期待囡囡準備的父親節驚喜。他更自爆烏龍事，連累囝囝欠交功課。
撰文：B.M
後日父親節，一向愛錫子女的森美，最希望就是囡囡為他彈奏一曲，他日前接受專訪時甜絲絲說：「囡囡喺今年母親節，為媽媽以結他自彈自唱咗一首歌，可惜條片意外被deleted咗，所以今次父親節我哋兩公婆都不停出口術，想收到囡囡為爸爸再彈一次結他做禮物。結果俾囡囡取笑，問做乜𠵱家啲父母咁奇怪，主動要求要收乜禮物都有嘅！不過因為我未見過囡囡彈結他，所以好希望可以收到呢份心意！」
疫情期間，森美分享了與家人齊齊沖咖啡的趣事：「因為疫情期間我買咗部相當專業嘅咖啡機，所以自此展開咗一家人鬥玩咖啡拉花嘅比賽。因為我刻意唔學點沖咖啡同拉花，所以我每日返到屋企都好似皇帝式享受咁，一對仔女同太太都會追問我飲唔飲咖啡。而『朕』就會揀今日想飲邊位沖嘅咖啡，有時又會一人沖一杯，然後我會為咖啡評分，大家一齊討論吓點樣沖得好飲啲。有時佢哋啲拉花都好高藝術性，開頭睇以為係蘭花，點知原來係心形。而囝囝仲參加咗英國嘅咖啡品賞班，所以咖啡成為咗疫情下一家人最開心嘅活動。」
父母與子女相處，當然有辣有唔辣，森美雖然一向很關注孩子成長，亦坦然自己對家人也有鬧情緒的時候，而且他在平日人前精明的背後，原來也有不少蝦碌事件：「 記得有次見到阿仔份功課啲字好核突，我就幫佢刪晒啲字，點知唔記得同佢講，第二日返到學校，阿仔先發現點解啲字唔見咗！又試過幫阿仔去圖書館借《西遊記》做功課，原來《西遊記》有分三冊，但我只借咗上下集畀佢，結果搞到佢份功課唔合格！」所以當問到森美如何評價自己爸爸的角色，他也笑說應該只有60多分，尚有進步空間。
今個父親節，森美除了期待囡囡準備的禮物外，由他和陳豪配音的《比得兔2：走佬日記》大電影亦會上映，他笑指主角比得兔的個性和自己很相似，同樣是吱吱咋咋，很多說話，因此配音工作也相當愉快。而與好友陳豪再次合作，相處時發現對方對照顧小朋友很有耐性和井井有條，認為很值得學習。
服裝提供：Loewe、COS
場地提供 : Greyhound Café Galleria @greyhoundcafehk
更多精采時尚內容，盡在http://add.appledaily.com。