俄羅斯喺周三嘅歐國盃B組分組賽，憑阿歷斯米蘭卓克嘅唯一入波，主場1:0小勝芬蘭，打開今屆賽事嘅勝利之門兼保住出線希望。今場波一開波，芬蘭就先有普贊柏路接應左路傳中搶點頂入，不過被判越位在先入球無效。俄羅斯企穩陣腳之後慢慢主導攻勢圍攻芬蘭，不過要等到上半場補時階段，先至靠阿歷斯米蘭卓克禁區內右路妙射先開紀錄。換邊後芬蘭嘗試反攻對手，雖然佢哋控球佔多，不過埋門處理始終欠質素，反而俄羅斯幾次快速反擊都好有威脅，其中古斯耶耶夫72分鐘嘅射門仲爭啲射成2:0，好彩芬蘭門將哈迪基飛身撲出。最終俄羅斯保住1:0勝局完場，賽後同芬蘭同得三分，保住出線希望。