21/22球季嘅英超會喺8月14日開鑼，賽會就喺禮拜三率先公佈來季賽程。首輪焦點一戰必數上季冠軍曼城作客鬥主帥懸空嘅熱刺，藍月前七輪要連番硬碰Big 6球隊，或者會影響開季戰績。不過上季曼城開季成績都係麻麻地，但靠季中連贏後上成功奪冠。至於亞軍曼聯就喺主場迎戰列斯聯，列斯上季下半段防守大有改善，紅魔喺奧脫福出擊都難言穩勝。新季有傷兵回歸嘅利物浦，揭幕戰會作客鬥英冠冠軍諾域治。2隊喺19/20球季揭幕戰鬥過，當時紅軍主場4:1大勝對手，唔少紅軍球迷都認為係吉兆。今季呢支「升班馬」開季前四輪要接連硬撼紅軍、藍月、李斯特城同阿仙奴，要攞新季首勝唔易。至於曼市打吡2循環會喺11月6日同下年3月5日上演，「雙紅會」（圖）就喺10月23日同下年3月19日上演。