早前工聯會黃國健喺立法會提出「全 方位增加土地供應」期間，同黨麥美娟將矛頭指向地產商，話政府放任地產商囤地，辣㷫即將踏入76歲嘅地產及建造界議員經民聯石禮謙，互相指摘大家係「政棍」。話口未完，噚日石禮謙真係攞住支「棍」去立法會開會，唔通今次真係俾「𡃁妹仔」開口中？
前排工聯會會長吳秋北寫文鬧「地產霸權」，石禮謙即刻反駁係搞文革，仲話希望新嘅立法會趕走「政棍」。麥美娟一聽到就護主心切，撲出嚟話「如果為基層市民謀福祉、為打工仔女爭權益就是『政棍』，那麼香港這類『政棍』太少」。石禮謙亦不甘示弱，鬧工聯會「玩概念、玩鬥爭」、麥美娟呢啲「𡃁妹仔」、「政棍」係懵嘅。
估唔到石禮謙唔係得把口，噚日真係拎住碌棍喺立法會度行。佢同八方講，實情係佢自己想減肥，所以諗住喺屋企跳幾下幫助燒脂，點知一個唔小心就跌咗落地下，仲扭親條腰嘅第3至5節，搞到佢瞓咗喺屋企成個星期。石禮謙仲話，佢已經睇咗中醫，亦都有敷藥紓緩痛楚，暫時都冇乜大礙喎。
李八方