禮拜二歐國盃F組德國鬥法國嘅大戰進行之前，安聯球場突然出現「天降奇兵」（圖），喺佢落地嗰陣仲絆到連接運動場攝影機嘅電纜然後失控打圈，爭少少就撞到球員同觀眾，好彩佢最後成功降落球場，只係受輕傷。原來呢位「傘兵」嚟自綠色和平，佢嘅黃色降落傘度就印住咗「反對石油」，話希望宣傳棄用石油嚟保護環境喎。