海俊傑日前接受車淑梅訪問，重提當年得罪唱片公司及被冤枉「鹹豬手」。年少氣盛的海俊傑1994年奪新秀冠軍後，追問公司高層何時為他出第二張唱片，對公司安排拍劇不聽話兼發脾氣，他說：「當年同古天樂都係華星歌手，未夠兩年我爆咗句『我對唱片公司冇希望』，我唔知古天樂又係咁講，跟住大家都冇得唱，其實做得唔開心，自己走就好。」
1999年離開外闖，海俊傑說：「外邊有人傳我飲醉酒，甚至乎蝦女仔。其實真係好冤枉，嗰一次係嗰個人故意造新聞。我同佢拍電視劇時好熟，我有啲嘢睇唔過眼想提醒佢，點知佢反而攻擊我，話我鹹豬手騷擾佢，我當然要平反，真係好無辜，我學識咗喺女演員面前要事事小心。」