唔少手足義士因抗爭身陷囹圄，信件成為牆內外重要聯繫打氣方式。去年開始協助搜羅探監用品嘅零食店Jimmy Jungle聯同囚權組織石牆花、「寫信師」等一齊合作，花咗約一個月時間，精心製作「最強5**寫信攻略」，希望幫有心人同牆內手足建立筆友關係之餘可以改善寫信技巧，等牆內手足睇得開心。
寫信為牆內手足打氣，最重要嘅精神係「重質不重量」，Jimmy Jungle喺fb貼出攻略，分類做書信基本特質、技巧、牆內人士喜歡或不喜歡收到嘅內容等；落單買零食仲會隨箱附送一本列印版，大家亦可以去指定店舖領取，講明「只要有心，人人都可以係專業寫信師」，同時提唔應該太倚賴攻略，「太多嘅形式反而會令信生硬，心意同創意係最重要」。
石牆花喺fb分享，話為牆內外配對做筆友嘅「和你做筆友」計劃至今已運作約一年半，感激一眾寫信師努力，但因為在囚人士喺獄中日子越長，對信件需求亦會有唔同，「手足確實需要更長期及深入的交流和寄託」；希望攻略可以畀大家提供一啲參考。
李八方