英格蘭職業球員工會（PFA）禮拜日公佈，曼城中場奇雲迪布尼當選咗做最佳球員，成為史上第3位連奪2季英格蘭球員先生殊榮嘅球員，佢隊友菲爾科頓就獲選為PFA最佳年輕球員。
29歲嘅比利時球星迪布尼，擊敗咗隊友根度簡、菲爾科頓、魯賓戴亞斯、熱刺嘅哈利卡尼同埋曼聯嘅般奴費南迪斯，成為繼阿仙奴名宿亨利同埋前曼聯球星基斯坦奴朗拿度（C朗）後，第三位球員可以成功蟬聯英格蘭球員先生。今季喺聯賽為重奪英超冠軍嘅曼城上陣2,001分鐘、射入6球同貢獻12次助攻嘅迪布尼話︰「我當然希望可以幫隊波贏到所有錦標，但呢個就係個人獎項入面最重要嘅一個。」至於21歲嘅菲爾科頓今季各項賽事為曼城上陣50場並射入16球，贏得PFA最佳年輕球員嘅佢就話好榮幸︰「過去有啲偉大球員贏過呢個獎，我覺得好好彩，因為今年有太多出色嘅年輕球員。」
PFA女子最佳球員就由車路士嘅姬比獲得，呢位英格蘭前鋒今季各項賽事射入25球，協助車路士女子隊喺超級聯賽衞冕成功，仲贏得聯賽盃冠軍同埋打入女子歐聯決賽。