有「奧地利伊巴」之稱嘅前韋斯咸射手阿拿奧杜域，兩年前突然放棄英超，走去中國掘金加盟上海上港，初時佢仲話過中超水平低，自己經常會飲可樂、芬達之類，不過佢喺中超仍然超班，今季喺中超第一場就「戴帽」，成功入選奧地利國家隊參加嚟緊嘅歐國盃。不過呢一年幾受疫情影響，阿拿奧杜域一直被困中國，飽受思鄉同骨肉分離之苦，結果佢近日返到國家隊報到，喺友賽對斯洛伐克嘅賽前記者會上爆喊：「我已經幾個月冇見過我嘅仔女同屋企人喇！真係唔容易，我喺中國經歷咗好多困難。我好開心可以返到奧地利，我會為呢個國家付出一切，令家人感到高興。」講完之後，已經32歲嘅阿拿奧杜域立即流下男兒淚，要由教練科達安慰。