經常拍拖入馬場同名下馬匹「源源動力」打氣嘅謝偉俊，噚日又同白姐姐白韻琹十指緊扣出現，見證愛駒終於贏出頭馬。本來拉頭馬係好事嚟嘅，但年紀有返咁上下嘅白姐姐除咗俾人誤以為係謝偉俊阿媽，仲因為記性麻麻，一度喺拉頭馬時唔記得戴口罩。
「源源動力」係澳洲五歲馬，上季嚟香港之後骨盆受傷，今季先可以出賽，之前跑咗七場最叻只跑第四，直至噚日終於識贏，得到57萬頭馬獎金，累積獎金至76萬元。
白姐姐話晒都就快77歲，謝偉俊噚日好細心全程拖實佢，影拉頭馬相時佢哋起初戴住口罩，但因為登記馬主只係謝偉俊，搞到有網上賽馬節目主持評述時誤以為謝偉俊拖住阿媽入場。唔知白姐姐係咪一把年紀記性麻麻哋，影完頭馬相一度唔記得戴返口罩，要馬會職員提佢，謝偉俊即時幫佢整理口罩。謝偉俊話，白姐姐曾經養過匹馬叫「小燕子」仲贏過四場，今次「源源動力」贏馬，相信係白姐姐入場帶畀佢好運。
李八方