車路士喺上月贏咗歐聯冠軍，當時賽後車仔領隊杜曹已經話呢個冠軍，好可能會為佢贏到新合約，結果禮拜五佢就夢想成真，事關車仔同咗佢續約2年去到2024年，呢位47歲領隊就話：「目前係續約嘅最好時機，好感激有呢半年嘅經歷，亦好高興可以繼續成為車路士大家庭嘅一分子。我哋依然雄心壯志，對下一步充滿期待。」