歐國盃嚟緊11號開波，有香港直播權嘅now TV噚日舉行啟動禮，早前宣佈設立比較輕鬆嘅「歐國盃第三聲道」，除咗有ERROR成員同強尼做評述員，仲會有啱Channel、試當真同小薯茄等頻道KOL，同標準流浪守將盧均宜、劍擊運動員文毅施、香港單車前代表馬詠茹等做主持。盧均宜就睇好法國同比利時，仲話今次可以同啲KOL合作主持係個新嘗試：「佢哋有口才、轉數快，但足球方面我同謝德謙可能較熟悉。」冠忠南區守門員謝德謙亦睇好法國，大讚佢哋三線平均，「我鍾意洛里斯，但如果要睇表現，我會想睇丹麥，今屆想睇卡斯柏舒米高有咩表現。仲有西班牙會用邊一個守龍？仲會唔會用迪基亞？」另外，ViuTV將免費直播六場歐國盃賽事，包括揭幕戰同決賽。