在囚者接收牆外資訊，渠道本來就少之又少，如果單獨囚禁，就可能連睇電視睇新聞嘅選擇都冇，只可以單靠睇報紙獲得資訊。六四前夕，牆內人自然想留意關於六四悼念嘅新聞，不過八方就聽聞，噚日監房派發訂閱報紙時，壹傳媒創辦人黎智英唔知點解收唔到《蘋果日報》。
喺監獄訂報，要透過懲教署申請，根據懲教規定，在囚人士可申請每日收取一份報紙，由親友向有關報章嘅督印人或註冊代理商訂閱報紙。肥佬黎一直喺獄中透過讀《蘋果》了解社會資訊，一直派報都冇問題。但噚日就發生「意外」，佢唔知點解收唔到《蘋果》，佢嘅家人向訂報嘅報檔查詢，對方話可能係遺漏咗，但其他人訂嘅《蘋果》又冇漏，於是肥佬黎家人又向福利官提出，今日派報補返噚日漏派報紙得唔得？對方就話唔可以。
八方有向懲教署公共關係組查詢，佢哋話如在囚人士對報紙供應商有任何意見，可透過院所管方反映，或直接向代理商提出。其實即使係舊報紙，對在囚者嚟講，都係好寶貴牆外資訊來源。
李八方