前年7.21元朗黑夜，原本係保護市民嘅警察集體唔見人39分鐘，時任八鄉分區指揮官叫李漢民。佢當時聲大大話自己「我睇唔到錶呀」，又同記者講：「你咁樣係唔會令我驚㗎」而成為標誌人物，佢近日獲「獎賞」，最新一期《警聲》披露連埋佢共39個警務人員，上月獲鄧姓團夥頭目、即係警務處長頒發晉升函件，紮職做咗警司。
八方記得監警會份專題報告話，李漢民當晚說法迴避記者問題，建議警隊管理層加強對高級警務人員應對傳媒嘅培訓，但家陣拋出「假新聞」三字如同無敵，仲要培訓咩？不過，李漢民曾被本報揭發單位有多個僭建物，之後拆走。
至於其他有份升職嘅唔少都有非一般威水史。例如曾着便衣扮示威者混入人群、被識穿後搞到插水詐暈再彈起身舉委任證嘅周學賢，之後做到O記總督察，佢前年主責時任浸大學生會會長方仲賢被搜出觀星筆案，將觀星筆叫「雷射槍」，仲指控方係管有攻擊性武器罪；另一個倪采欣就喺去年做中區警民關係主任期間，着便服現身區會會議但拒絕應議員要求出示委任證，仲話自己要「捍衞香港警察尊嚴」，隨即被揶揄「唔係行使警權，難道做緊義工？」佢哋嘅明日之星潛質表露無遺，唔升職實在太嘥料！
李八方