手機用戶請按此放大圖表
唔少本港氣象迷嘅熱門話題除咗係連場大驟雨來襲，仲有天文台報錯多區雨量，將「超過10毫米」打錯成「超過10米」。大雨變海嘯，難怪網民都講笑話要坐「挪亞方舟先搞得掂」。
話說天文台如常喺前晚11點15分出稿綜合全日本地天氣概況，眼利嘅市民發現多區錄得嘅雨量由「超過10毫米」打錯成「超過10米」，亦即係10,000毫米，相差近千倍都咪話唔驚嚇。
10,000毫米雨量係咩概念？𠵱家黑雨標準係香港廣泛地區錄得或者預料每小時雨量超過70毫米。就算剛達到黑雨標準嘅暴雨瞬間傾盤落晒亦只係1.7米，相比海嘯級嘅10米仲爭好遠。
睇番香港嘅天氣紀錄，1926年7月19日係香港歷來單日落得最多雨嘅一日，都只係得534毫米。好在天文台好快知道出錯，只係隔咗15分鐘就出稿更正。
李八方