手機用戶請按此放大圖表
近來監房熱到爆發人道災難問題，社會有好多討論，好多人都唔明白點解懲教署咁多年嚟只加裝牛角扇，令酷熱問題長年未解決。石牆花噚日喺facebook貼文，話呢排收到唔少創意留言，希望幫監房降溫，包括贊助懲教署買冷氣、抽濕機，甚至願意代交電費，天馬行空嘅想法，都係求在囚人士得到人道對待。
石牆花喺帖文仲話，除咗提出贊助懲教署改善監房環境外，市民仲有好多物資想捐畀牆內手足降溫，包括白花油、紫花油、涼粉、綠豆沙等，等牆內人可以解暑。石牆花話市民咁熱烈嘅反應，拍落懲教署身上就有好大反差，皆因咁多年署方淨係識裝牛角扇同滾筒扇，在囚人士一到夏天就好似「蒸爐裏的小籠包」。
總結監獄過熱主因，石牆花認為係建築物大量吸熱，解決方法其實唔使專家，就咁講都有幾種，例如屋頂淋水、 種天葵類植物、安裝太陽能板或者噴灑防熱塗層，一啲都唔複雜，只係在乎署方願唔願意做。女囚友要着長褲，加上生理周期，炎夏對女性嚟講更加難受，只要稍帶同理心，全港監獄即使一下子難改善，咪先改善女性監獄。都係嗰句，只在乎願唔願意做。
李八方