2019年夏天宣佈掛靴嘅西班牙金童費蘭度托利斯，禮拜二突然喺ig上宣佈復出，消息震驚球壇！現年已經37歲嘅費托，喺ig上發佈咗張9號波衫嘅相，但就用咗黑白色保持神秘感，仲寫上「我對生活只有一種理解，就係足球喇！所以我決定復出，禮拜五會再公佈去向。」
費托仲喺留言度，寫上「#捲土重來」、「#復出踢波」，引發球迷熱烈討論。2001年喺馬德里體育會出道嘅費托，曾經效力過利物浦、車路士同AC米蘭，2016年重返母會馬體會後，2018年再去咗日本加盟鳥棲砂岩，最終2019年8月宣佈掛靴。
不過費托退役後其實冇離開過足球，返咗去母會擔任青年軍教練，舊年7月成功考獲足球教練牌嘅佢，今年1月仲俾馬體會正式任命為B隊主帥。球迷亦唔使擔心費托退休兩年會走樣，事關今年1月，費托幫東南亞一間網上博彩公司拍宣傳短片嗰陣，唔少球迷發現費托變咗做大隻仔，可見呢段期間費托就算冇踢波，都仲一直鍛煉緊自己，再戰綠茵草場相信唔係問題，唔知有冇機會嚟港超獻技呢？到時肯定場場爆滿啦！
