昨日盧覓雪出席辯論前獲多方好友支持，杜汶澤早於前晚便在fb出帖，貼出將盧覓雪P成「蛇精女」頭像的《視點31》宣傳照，來諷刺其對手玻璃朱，他留言道：「雪雪，既然人哋都P到飛起，你無奶油唔一齊P㗎？玩雙P呀嘛！」盧覓雪之後轉發該帖：「杜汶澤，你想笑死我咩？」於昨早的商台節目《在晴朗的一天出發》中，與盧覓雪同主持的林海峰及阮子健亦為她打氣，指會收看節目，林海峰更多次叫她留力：「我就唔會同你爭辯，我覺得我實輸，好在冇請我。」當盧覓雪講到為小朋友健康就唔好畀手機，林海峰搞鬼問：「係唔係驚P圖？」盧覓雪立刻爆笑：「梗係啦！第一樣就驚呢個。」據知玻璃朱是「硬天師」林海峰粉絲，2013年她曾為軟硬天師《山頂嘅朋友》MV客串，出鏡約4秒，2017年亦上過《晴朗》做嘉賓，又於Ig貼出與林海峰等人的合照。
盧覓雪十分重視今次舌戰，昨日出席錄影前貼出打拳姿勢的相片道：「方便我隨時有大動作，你知啦拳腳無眼嘛！」商台DJ朱薰則晒同事大合照跟盧覓雪講加油，笑言「翠蓮出征，你咁猛小心打爆玻璃，成班友撐硬你」，獲盧覓雪轉載及留言：「多謝各位903同事為我集氣！大家等我凱旋而歸啦！」
