德國足總禮拜二喺官網宣佈，費歷克將會喺今夏歐國盃結束後，接替路維成德國國家隊主帥，雙方簽約至2024年夏天，意味費歷克將會帶領德國衝擊2022年卡塔爾世盃。費歷克喺2006至2014年一直做路維嘅副手，2人曾經合作贏過2014年世盃冠軍。2019年成為拜仁助教嘅費歷克，同年年尾接替尼高高華任主帥，成功帶領拜仁成為三冠王。今季雖然再贏德甲，但因為同體育總監沙歷咸美錫不和離開拜仁。費歷克簽約後就話，好期待同國家隊高質素嘅球員合作，仲好期待帶領德國參加即將舉行嘅大賽，又祝福路維今夏歐國盃取得成功。費歷克嘅「地標」戰將會係今年9月2日，帶領德國作客列支敦士登參加世盃外J組賽事。