今日香港將會睇到一個特別天文現象，就係會出現月全食，同時又係全年最大嘅超級月亮，即係全年最大嘅滿月，而且喺月食期間，月亮會變成暗紅色，即係坊間所謂嘅「超級血月」，難得有罕見嘅天文現象，天文台自然想令更多市民睇到，所以今日將會係天文台嘅facebook直播成個月食過程。
天文台係facebook出po，話如果天氣情況許可，市民有機會睇到成個月全食過程，仲話呢次月全食會喺今晚7點09分開始，到7點28分結束，呢段期間月亮係唔會完全消失嘅，而係會呈現暗紅色，亦即係所謂嘅「血月」。
雖然坊間有傳「血月」係不祥之兆，但八方查過網上同天文台嘅資料，其實月亮呈現暗紅色都係自然現象，因為太陽光入面嘅藍色波段喺地球大氣層散射過程中被散射，剩餘嘅紅光再被折射到月球上面，所以月亮就呈暗紅色。
如果唔想睇網上直播，市民去邊度親身睇最好？太空館建議市民可以去面向東南面、不受阻擋嘅地方睇，好似屯門海濱、大埔海濱、黃埔海濱或者石澳等地都適合，到時市民用肉眼已可以睇到。
李八方