馬德里體育會上周六作客以2:1擊敗華拉度列，成功壓倒同市宿敵皇家馬德里重奪西甲冠軍，最開心嘅一定係俾巴塞隆拿侮辱式拋棄嘅烏拉圭前鋒蘇亞雷斯，大巴摑咗落今季聯賽只係得第三名嘅舊東家塊面。馬體會早前專登返咗主場搞捧盃儀式，阿蘇就喺ig分享咗佢同隊友、屋企人加埋球迷慶祝嘅相同埋片。片入面見到，阿蘇同三個仔女喺球場平台影完威水相之後高舉獎盃，場外嘅馬體會球迷隨即歡呼，場面非常熱鬧。雖然之前有報道就話，呢位今季為馬體會攻入咗21球嘅34歲捧盃功臣可能會重返利物浦，但佢已經否認咗呢個消息，並且強調自己下季肯定會留喺馬體會。