網上股票騙局禁之不絕，幾荒謬都有人信，令到證監會好頭痕，近月亦高調嚴打「微信女」。為進一步提高投資者警覺性，證監上個月「放蛇」三個星期，喺本地網上論壇、流動投資Apps同財經新聞網站上面刊登多個網頁橫額，模仿微信女口吻引誘投資者落叠，結果發現有成2.4萬人click入去。
證監會數據顯示，大部份Click入去嘅都係年輕投資者，瀏覽人數最多嘅年齡組別為25至34歲，有31%；其次係55至64歲（23%）；隨後為18至24歲（19%）、35至44歲（14%）同45至54歲（13%）。
證監會梗係唔會有股票貼士畀大家，撳入去會彈出證監會嘅提示，入面介紹「唱高散貨」慣常手法，希望呢個模擬騙局嘅體驗可以警惕大家啦，特別係經驗較淺嘅投資者，要小心考慮同核實喺網上見到嘅資料，免得貪字得個貧！
李華華