歐洲聯賽就逐一告一段落，連港超星期日都煞科，唔知大家有冇去大球場捧場，烈日當空頂到高溫，咪講話踢波，睇波都辛苦，香港球市真係靠大家堅持。
反而澳洲就步入冬天，澳職常規賽進入白熱化階段，仲有2、3場畀中游隊搏前6。先講星期二場布里斯班獅吼主場對墨爾本城（圖），龍頭大哥墨城一如所料咁擊敗中岸水手，已經夠晒分做常規賽一哥，開始有一啲輪換政策，畀班主力唞一唞，好好去準備季後賽。
至於獅吼想保住前六，而且希望季後賽有主場之利，對住輪換調整期間嘅墨城一定要攞分。盤路睇起上嚟，作客嘅墨爾本城讓平/半絕對冇問題，但盤路上小弟覺得應該就半球以上，平/半實屬鬼盤，所以小弟撐主隊嘅獅吼下盤，考慮墨城應該收晒主力，補多個「細」。
另一場就係星期三嘅西悉尼流浪者主場對威靈頓鳳凰；西悉近期狀態下滑得好緊要，上仗對FC悉尼，一失波就睇到完全冇入波能力。鳳凰表現頑強，而且球員效率幾好，唔經唔覺八場都冇輸過，呢場波西悉仲要讓平/半，上盤睇嚟都凶多吉少，大家開波前都同樣31分，鳳凰有勢梗係想大勝，打沉對手鬥志，再要埋個「大」就啱數。
文：黃耀富
截稿前馬會尚未開盤，盤口僅供參考，讀者記得留意足智彩網頁。