10.1示威案噚日處理10個民主派人士陳情，各人對判刑打定輸數，所以法庭嘅打氣聲此起彼落，而且因為一眾被告都被還柙，各人把握機會利用庭審時間當見面機會，結果仲變成咗放閃大會。
事緣英超煞科，上屆冠軍利物浦早已宣告衞冕失敗，但留低來屆有冇得出戰歐聯嘅懸念，結果利記殺入前四任務總算完成。民主黨前主席楊森進庭時，忽然有人大叫「利物浦排第三呀！」楊森聽到即時笑容滿面，唔通佢係利迷？原來為楊森報上英超快訊嘅係佢老婆Irene，坐喺旁邊嘅李永達就問Irene，楊森係唔係利迷，點知個答案甜到爆：「我鍾意吖嘛！佢唔敢唔鍾意。」
同場加映工黨李卓人放閃行動，向老婆「娥姐」鄧燕娥高呼「Happy Anniversary!（結婚周年快樂）」。之不過，「娥姐」好似唔太記得佢哋已經結咗婚幾多年囉。
李八方