西班牙教練安歷基周一出席記者會,公佈今屆歐國盃嘅24人大軍名單,皇家馬德里兼西班牙國家隊隊長沙治奧拉莫斯冇份入選,唔知算唔算意外喇。近15年從未缺席國家隊所有國際大賽嘅拉莫斯今季傷多過踢,最終呢位35歲老將未有獲選,無緣第四次參加歐國盃喇;至於啱啱喺今個月入籍西班牙嘅曼城後衞拿樸迪就順利入選。除咗拉莫斯外,丹尼爾卡華積、拿祖費南迪斯同艾斯高等效力皇馬嘅國家隊常客,同樣冇份入選今次歐國盃名單,令今次西班牙出現「零皇馬球員」情況。