旨呈於單親家庭長大，曾是叛逆少年，「我13、14歲左右，父母分開，嗰時好反叛，覺得朋友先陪到我，阿娘掛住做生意，父親又消失咗。」他經常流連遊戲機中心，「第二朝5、6點返屋企都冇人知。」媽媽不想他學壞，勒令他停學，跟她返公司做boy，「我太曳，加上有嚴重哮喘，停咗一年學，嗰段時間喺公司乜都學。」
旨呈的兄長和三位妹妹，跟他都是同母異父，他說：「我有一位哥哥，佢有自閉症同輕度弱智，而三個妹都好細，所以娘親對我要求好高，因為我要繼承家族生意。𠵱家娘親同三個妹移民去咗新加坡，疫情關係，我哋都有年幾冇見。」哥哥跟他一齊成長，兄弟感情相對較深厚，「哥哥天生有自閉症，反而係最開心，唔需要諗太多嘢，我安排佢去庇護工場。」