商天娥（娥姐）昨日在深水埗為家品店擔任開幕剪綵嘉賓，疫情下，娥姐在家主理飲食：「最近除咗煮食，亦花好多時間做運動，每日飯後堅持步行半個鐘，最少行一萬步。」她每年都會因工作出埠多次，但疫情關係已推掉很多，包括在內地及東南亞的拍攝工作，娥姐說：「因為唔想隔離，等7月之後嘅工作。」
提到ViuTV節目《晚吹——又要威又要戴頭盔》日前邀請無綫前編劇亮相，反映不受尊重，劇本被演員隨時改動，娥姐指任何行業都會有這情況出現，她說：「做寫字樓都會有改動呢啲情況，最重要係互相尊重情況下去改善到最好，同埋每個人用乜態度去睇對方，將件事往好嘅方向睇就會好，如果唔好嘅話，你會覺得對方多事。」