612基金一直為抗爭者提供法律支援，而有良知嘅香港人一直冇袖手旁觀，反而身體力行有錢出錢有力出力，捐錢畀「612基金」。上月中旬612基金告急話基金需要錢，仲話4月要籌款1,500萬。雖然呢個絕對唔係小數目，但香港人再次冇令大家失望，基金噚日公佈咗4月份財務及工作簡報，與其話基金達標，更加係香港人又一次展示團結。
根據基金公佈嘅數字（圖），原來整個4月份共收到捐款1,693萬，嚟自超過1.3萬個市民嘅真心白銀，較眾籌目標更加係超額完成，基金亦批出咗1,572萬款項，所以基金現時可動用結餘唔係好多，只係得番224萬左右，但佢哋暫時未有再呼籲大家眾籌，不過就呼籲大家可以登記網上月捐或者定期捐款。又係嘅，萬一基金戶口累積龐大結餘，風險就肯定倍增。
其實睇返基金成立到家陣，原來已經直接支援超過2.2萬人次，裏面有包括提供法律費用、借出保釋金、還柙在囚物資、緊急經濟援助、醫療及情緒支援費用等等，但大家要記住，支持行動尚未完結，未來仲要繼續努力。
李八方