多蒙特喺星期四德盃決賽硬撼RB萊比錫，結果憑隊中2大新星查頓辛祖同艾寧夏蘭特各入2球，以4:1大勝對手奪冠。今次亦都係夏蘭特加盟蜜蜂兵團之後贏得嘅首個錦標，不過另一邊廂萊比錫教練尼高斯曼就要帶住遺憾離隊喇。
多蒙特今場贏得相當輕鬆，上半場已經由辛祖射入兩球，加上夏蘭特亦攻入一球，半場遙遙領先3:0。雖然萊比錫下半場中段靠丹尼爾奧莫追番一球，不過夏蘭特完場前三分鐘又入多粒，為球隊奠定4:1勝局。多蒙特相隔四年之後再次捧起德國盃，今次亦都係夏蘭特自薩爾斯堡紅牛加盟後嘅首個錦標，不過盛傳呢位挪威天才今夏有機會離隊，唔知呢個會唔會成為佢喺多蒙特嘅最後一冠呢？
至於萊比錫就相當可憐，繼18/19球季嘅德盃後再次屈居亞軍。球隊自2016年升上德甲後，已經先後喺聯賽同德盃夾埋3次做阿2，教練尼高斯曼下季就會轉投拜仁慕尼黑，最後一季都唔能夠幫萊比錫贏冠軍，但相信佢去到拜仁後，錦標就會源源不絕咁嚟。