獎盃得來唔易，荷甲班霸阿積士竟然燒咗佢？周三阿積士喺社交網發佈一條片，見佢哋將今屆荷甲冠軍碟燒融晒（圖），轉換成42,000粒迷你星星（小圖）送畀球迷。片段所見，阿積士足球總監奧華馬斯將冠軍碟拎去燒，球員杜辛泰迪治、賴恩格雲貝治同利辛度馬天尼斯等都有現身，見證冠軍銀碟融晒後，整成一粒粒銀色星星，到最後由奧華馬斯拎走，準備送畀阿積士球迷。據報由周三開始，每個阿積士季票持有人都會收到一粒星星，阿積士總經理雲達沙話：「今季我哋喺冇球迷嘅球場比賽，不過每星期都感受到佢哋嘅支持，以前成日話冠軍係球迷嘅，今次分享獎盃就係最好證明喇。」