「變革」有徵兆，2019年爆粗的麥美娟，近期風頭遭郭偉強蓋過。後者用六坨屎做背景fb，鬧人「背祖忘宗，賣國求榮的人講盡孝，都一樣難聽過粗口」，擺到明，借胡志偉被懲教拒絕奔喪，重新撩起「嗰個女仔」粗口鬧林鄭的糗嘢。郭偉強唔同「嗰個在施政報告宣讀中訂大閘蟹的張大叔」，同門師姐竟然敢郁，看來已完善會內鬥爭制度，不必擲菠蘿，就算開車途中用Zoom開會，架車唔係劉智鵬口中的戰馬，不怕被控危駕。
fb屎背景出街，正是市民在竹篙灣三餐不是嘔吐物就是鞋墊與暗器，屙到抽筋坐監真人騷之時。工聯會另一張海報冇咁反胃，網民有反應。海報宣揚愛國者治港，「讓我們走得更遠」。最佳男主角PK做唔成海報主題，工會懶醒將油公司的海報移花接木。貨輪讓人想到卡在蘇彝士運河五日的長賜號，專家指塞船災難導致全球貨運貿易每小時損失高達31億！媽啊，愛國者廁身貨輪，似着草多啲！「走得更遠」這一句煽動味濃，PK唔使光顧按摩，自動波打通忠誠神經，向這些鄭月娥定性為「逃犯」者喊話：「咁我唔理都唔得啦！」