歐超聯風波又有新發展，歐洲足協（UEFA）上星期曾經話過，會向皇家馬德里（白衫）、巴塞隆拿（紅藍衫）同祖雲達斯呢三間仲未退出嘅球會採取「適當行動」。周三UEFA就宣佈任命咗紀律調查員，就有關球會加入歐超聯係咪違反UEFA規定進行調查，不過UEFA未有進一步話點罰。有傳UEFA曾經考慮禁止皇巴祖參加歐戰兩年，不過西班牙馬德里法院早排就頒令禁止UEFA同國際足協以任何制裁方式阻止歐超聯成立，唔知UEFA嘅行動同馬德里法院嘅命令有冇牴觸。至於已經退出歐超聯嘅九間球會，早前已經接受UEFA嘅經濟處分，包括捐1,500萬歐元支援發展歐洲兒童同基層足球，仲扣減5%歐戰收入，為期一季。