播音皇帝李我於上周三與世長辭，享年99歲，他與結婚逾71年的太太蕭湘一直相守相依，湘姨接受《蘋果》電話訪問，透露李我叔的喪禮定於下月1日在香港殯儀館設靈，翌日出殯，由於疫情關係，不會設公祭。湘姨表示：「能夠送佢最後一程覺得安慰，佢喺5月1號夜晚8點幾入將軍澳醫院，半夜3點幾醫院打嚟，我知唔係好事，即刻搵姪女車我去醫院，嗰時佢已經好危，終於拖到幾日。」
直至上周三，李我叔進入彌留狀態，湘姨說：「一直摸住佢隻手講好多說話，佢好似有感覺，知我安慰佢，佢眼中有淚光。」之後湘姨語帶哽咽憶述：「我話你唔使掛住我，有好多人錫我，唔緊要，你好好哋離開，喺夢中見吓我啦！終於陪到佢最後一口氣！」