厄瓜多爾翼鋒、35歲嘅路爾斯華倫西亞（圖）周三喺twitter宣佈掛靴喇。要數華西最令球迷印象深刻嘅事，一定係佢效力曼聯嗰陣一度着過好有象徵性嘅曼聯7號波衫，但佢就被評為球會史上最冇星味嘅7號仔，但講真，要佢同簡東拿、碧咸同基斯坦奴朗拿度呢啲紅魔icon比，又真係有點兒那個。不過華西踢翼又得踢閘都得，生涯後期仲同一樣轉型打閘嘅艾舒利楊格被稱為「左楊右華」，都係球迷嘅回憶。2019年華西因為傷病影響狀態，加上唔再受重用，所以就離開咗踢咗10年嘅曼聯，重返家鄉厄瓜多爾繼續踢波。之後再轉投墨超球會克雷塔羅，最終就喺周三宣佈掛靴。