MIRROR早前傳出九展騷完結後，下一站將會接手楊千嬅放棄的紅館聖誕跨年檔期，前晚MIRROR經理人黃慧君（花姐）完騷後受訪，她否認曾入紙紅館，不過就有所保留地說：「我冇話唔做，但係要適當時候。」對於年底空出的紅館檔期，她說要再仔細研究：「工作安排未至於要去到年尾，大家心入面都想做紅館，但係咪時間適合，要再開會傾吓。」
另外，有傳姜濤今年將會孖毛舜筠合作，接拍處男電影，導演則由彭秀慧擔任，花姐坦言有計劃讓姜濤今年拍戲：「我哋有plan姜濤處女作喺今年發生，但詳情係點都要有待公佈。我同彭導演成日都有傾呢啲嘢，我覺得佢係一個拍嘢好細膩嘅女導演，我好希望姜濤可以遇到一個好似佢咁嘅導演，但係咪真係合作，都要再傾唔可以倉促，始終都係佢第一次。」姜濤受訪時稱好期待自己第一套戲，但要等公司安排，之後會了解清楚。