21日檢疫監宣告收皮，有人天真爛漫認為是豪宅業主向律戰司發出信提控的「壯舉」發揮效用。現實看，由佐敦劏房到中半山住戶，「盡了公民責任」配合入集中營受檢，除了硬啃暗器似的饅頭和鞋墊一樣的椒鹽豬扒時，上載照片，其餘時間就等政府熱線回覆，等等等，終於等到大台回應：可回家！二千多人有老有嫩，打算申索「冤牢」賠償者，暫時一個都冇。唔怕染疫，最忌檢疫，除了薄扶林一幢十戶敢於聯署（超過三千人）拒絕送檢之外，「香港人反抗」，2019年超團結的壯志，今天，被迫清零！豪宅住戶對記者投訴：「原地檢疫，內地小區都咁做啦，竹篙灣衰過坐監，送入嚟，真係匪夷所思！」豪宅居民針拮到肉，感受到未審先監的幽禁恐懼，「咁樣係唔會令我驚嘅」，除咗元朗指揮官李蛇，邊個夠薑咁講啊？
檢疫監雖然收皮但測試出忠誠廢物的普遍性，鄭月娥冇蝕章，膽又自大N倍。我重看石家莊河北地質大學年輕人因為校方以防疫為由不准五一假期離開校園，交涉期間過百學生湧出閘口逕自離去的錄影，真撐！執筆時逃出杭州動物園三頭未成年金錢豹中最後一頭仍未回歸，圍捕隊指牠「跑得像飛一樣」。嗯，盼牠能飛出圍城。