曼聯禮拜一宣佈，成功同卡雲尼延長合約一年，新約到2022年6月結束。卡雲尼上年夏天由法甲巴黎聖日耳門免費入「魔」後，今季各項賽事上陣35場入咗15球（未計周二戰果），喺曼聯家陣排英超第二同殺入歐霸盃決賽嘅道路上，都發揮咗好重要嘅作用。
卡雲尼亦好高興自己可以續約留隊：「呢一季我同球會產生咗深厚感情，感覺到自己同隊友及教練團之間建立咗密切嘅聯繫，佢哋每日都畀到我額外動力，我知道我哋可以攞到啲特殊成就。」有傳呢位烏拉圭球星今夏完約後，本來想返南美發展，考慮加盟阿甲小保加，紅魔名宿加利尼維利就好開心曼聯可以令佢回心轉意，仲坦承自己當初都質疑過簽卡雲尼嘅決定，點知佢每一方面嘅表現都咁出色。
不過，加利佬認為曼聯同卡雲尼續完約，今夏就唔需要再買多蒙特新星艾寧夏蘭特或者熱刺射手哈利卡尼，因為再簽射手反而會阻到格連活特嘅成長，瞄準翼鋒查頓辛祖會仲好：「睇番蘇斯克查嚟咗曼聯後嘅球會政策，我唔覺得佢哋會再簽另一位前鋒，呢個係我嘅推測。佢哋上年簽唔到辛祖，但如果之後半價爭到呢位多蒙特新星，陣容會再強好多。」