公司120歲生日喎，梗係要隆重其事，一班中電高層包括總裁蔣東強都為此獻歌喉。
中電為慶祝成立120周年，搞搞新意思，製作咗主題曲《同行．望遠》。
呢首歌係由25歲嘅中電二級工程師黃國雄（Sammy）一手包辦作曲同填詞，主要勉勵吓香港人同心協力克服困難。發掘呢位中電新星嘅原來係中電企業發展總裁莊偉茵，佢話喺一次公司活動留意到Sammy獻唱自己嘅作品，靈機一觸搵對方為公司創作主題曲。
除咗莊偉茵，中電總裁蔣東強（TK）同營運總裁羅嘉進等，聯同多位同事一齊為主題曲開金口，仲錄埋MV。雖則TK喺入錄音室前一個星期先收到樂譜同demo，練習時間有限，但據聞拍子好準下。
首歌除咗會上載至中電網站，稍後亦會成為中電客戶熱線嘅等候鈴聲，屆時市民都可以聽到蔣東強嘅歌喉到底有幾好。
李八方