因民主派初選案，至今被還柙已超過兩個月嘅前立法會議員「慢必」陳志全，周日宣佈辭任主席一職，並退出人民力量。人力副主席「錢錢」錢寶芬前晚就喺D100網台節目分享話，人力全體執委都支持同理解慢必今次決定，又透露向來幽默嘅人力副主席「快必」譚得志得知慢必決定後，笑說：「我𠵱家終於可以坐正（主席）嘞！」同場嘅快必太太聽到，亦不忘苦中作樂回應話：「你𠵱家咪坐正咗囉，喺荔枝角吖嘛！」
錢錢又話，黨友其後探訪慢必，轉告佢知快必上述嘅反應後，見到慢必「有少少釋懷、放心咗」。錢錢仲話，慢必退黨嘅聲明出街後，唔少巿民都同佢講完全理解同支持，反應都算好正面。佢呼籲關心慢必同快必嘅巿民，未來可以繼續寄信去人民力量會址，佢哋會繼續幫手轉交畀兩人。
李八方