逆權商人周小龍旗下品牌Chickeeduck，有好多間商場入面嘅分店被逼遷關門，所以佢決定物色街舖再開店，舊年喺天后開咗首間藝術生活百貨店後，噚日又再喺荃灣開多一間新店，今次仲好有設計特色。
今次新店內除咗有唔少有關反修例運動嘅畫作，正門仲有一個高約六呎嘅巨型民主女神半身雕像，雖然佔咗唔少空間，但周小龍就非常喜歡，佢接受傳媒訪問時話未來會繼續開分店。
新店首日開張已不時人頭湧湧，其實前一日周小龍同佢同事，仲身水身汗預備開幕，佢喺fb出文話當佢及同事們密密籌備、身水身汗之際，竟然有同路人行過，專登買咗一大堆嘢飲支持佢哋，周小龍仲話真心多謝呢兩位好人，話香港真係有好多好人。
李八方