ERROR成員「193」郭嘉駿早前狂寸無綫及副總經理曾志偉，被網民力捧人氣勁升，其Ig的追隨者更一星期內急升十多萬，現已坐擁超過24萬追隨者，認真犀利，連無綫藝人吳業坤（坤哥）近日都在fb貼出跟193的合照，沾對方人氣。相中見193主動搭着坤哥的膊頭，狀甚老友，而坤哥則留言：「講咗成年後生仔唱吓歌，放飛機者死。」
坤哥公開相片後，不少網民都驚訝兩人私下如此熟稔，還有人抵死留言問坤哥：「你係咪準備過檔呀？」更指坤哥甚有潛質加入ERROR成為一分子，但亦有網民戥坤哥身為無綫藝人的身份擔心：「咁大膽，睇住俾人雪藏呀。」坤哥昨日在將軍澳出席活動，被問到網民擔心其前途，他說：「唔擔心，我兩年前開演唱會，MIRROR都嚟做嘉賓，多啲唔同合作係好事。」