林雪在鏡頭前粗豪爛撻撻，但現實卻是個知足的好男人，他說男人可以風流，但不可下流，他強調只愛老婆一個︰「啲人成日話女人禍水，女人對男人真係有種魔力。不過我好有分寸，因為我好相信呢啲嘢要還，我已經攞咗世上好多嘢，唔想再孭住咁多嘢要還，所以我只愛我老婆一個，我有個賢內助好好，我日日都同佢拍拖，每日對佢情話綿綿。」
林雪與細十年的太太於1996結婚，兩人育有一子一女，他說自律可以抗拒誘惑︰「個個男人都會痴心妄想，我都想十個美女日日陪住我，當發夢就得啦。男人唔一定要搞女人至滿足到雄性征服感，將呢份心思同動力投入工作，去征服每個角色都有滿足感。」他說現在十分珍惜家庭︰「我好享受同屋企人分享快樂，喺屋企從來唔會覺得搵錢返嚟就大晒，同埋我屋企人好自覺，老婆仔女知我做嘢辛苦，有時遞上一杯茶咁簡單，我已經心滿意足，最緊要有心，作為男人我擔起膊頭，喺外面風風雨雨！太太就一點一滴將我融化。」