今季國際米蘭喺干地帶領下勢不可擋，事隔超過10年再度捧起意甲冠軍。雖然干地由季中一度被傳同高層不和，不過最終成功帶隊打破祖雲達斯喺意甲嘅壟斷，只不過呢位意大利名帥就話要享受奪冠感受，避談自己會唔會繼續留隊。
上季帶領國際以一分之差失落聯賽冠軍嘅干地，其實今季一度受到唔少質疑，上年11月喺歐聯出局之後，twitter仲曾經有唔少球迷要求干地離開，干地就認為國際球迷由始至終都支持佢，但就避談自己嘅去留：「我家陣只係會專注喺呢一刻，因為帶領到多年無冠嘅國際贏到意甲冠軍，實在太重要。」
收穫職業生涯首個聯賽冠軍嘅國際前鋒盧卡古，就興奮到走上街頭喺ig開直播同球迷慶祝，喺米蘭大教堂外面亦都有大批球迷狂歡開party，另一位奪冠功臣拿達路馬天尼斯就約咗班親朋戚友慶祝，仲攬住女友同人facetime報喜㖭！