港府昨日開始實施疫苗氣泡,食肆按不同接種疫苗及使用安心出行規定,設四級用餐區,若食肆員工及食客打兩針,就可設最多八人一枱、營業至凌晨2時、宴會人數更增至100人的D區。不過有傳媒報道,D類食肆近乎沒有,有業界中人指,原以為政府建議是明益大集團及大酒樓,怎知連這些酒樓也不接受政府「好意」,全因「好睇唔好食」,「冇人用嘅話,開個D區咪等於浪費地方,搵自己笨。」
該業界人士指新規定實施,他認識的一些大酒樓也是只開「B+C區」,即四人及六人一枱,該業界人士笑言,其實不是大時大節,「冇乜幾可六人或以上一枱食飯,特別疫情後,少咗好多一大班人出街食飯,最多四人左右」,亦正如他所說,不少傳媒也報道,多間大酒樓的C區也不爆滿,笑言,「若連C區都坐唔滿,仲浪費地方劃個D區做乜?不如用啲地方開多幾枱B區,做多啲生意。」
另一地區人士更笑言,他認識一名酒樓老闆,也指分區根本不可行,「佢做啲地區酒樓,梗係用盡每張枱位,成日細枱變大枱、大枱變細枱,𠵱家要限死一區區,咪搞死佢」,至於政府所謂員工及食客打完針可設八人枱,該地區人士笑稱,「為八人食飯,叫冇打疫苗嘅人去打針,仲有十幾廿日等疫苗生效?有冇人會咁做?」而且不少酒樓早已有應變招數,「八人咪分開兩張四人枱加塊膠板,又簡單又易做,使鬼勞師動眾搞個D區咩!」不過如此一來,政府想用疫苗氣泡令更多市民打疫苗計策怕且又落空。
季陶
周一及周五刊出