張建聲在電影《真．三國無双》中飾演張飛，要拿着十幾磅的「破軍蛇矛」殺敵，令他在片場中暑︰「第一日喺長沙開工，着咗件特技衫，擺支探熱針落個身，體感去到攝氏50幾度，拍嗰陣太大汗，連頭套都黐唔實飛出嚟，加上脫水又扁桃腺發炎，第三日已經中暑，好辛苦。」他說拍攝前曾拿着巨矛在酒店大堂練習「過背花」招式，豈料後面突然有人拍掌，他說︰「嗰晚練練吓突然聽到掌聲，原來班遊客以為我哋賣藝，大叫『好看』！」
拍攝時，張建聲與「劉備」楊祐寧及「關羽」韓庚譜出兄弟情︰「我啲普通話好一般，佢哋一cut機就會笑住問我『其實你說甚麼？』，後來我哋熟咗，去新西蘭拍攝時仲一齊去road trip、玩笨豬跳，我好珍惜彼此友情。」