終審法院前首席法官馬道立今年1月退休卸任後，隨即喺香港、新加坡同英國三地擔任仲裁員，而佢明顯仲想對法律界有再多啲貢獻，噚日中文大學就宣佈，委任馬道立做中大法律學榮譽教授，任期已由4月1日起生效，馬道立將會喺法學教育方面，為中大法律學院提供意見。
中大校長段崇智噚日高度推崇馬道立，話佢服務香港司法機構逾廿載，對本港法律界同法學教育發展貢獻重大，好榮幸邀馬道立出任法律學榮譽教授，認為佢嘅專業知識同豐富經驗將為中大學生帶來裨益。中大法律學院院長鄔楓亦話，對於馬道立的加入感到高興，認為將為學院立德垂範，同學、同事與馬道立交流可以獲益良多。
退休後嘅馬官近排似乎活躍咗，好似佢上月喺英國司法界一個網上論壇發言，罕有談及香港國安法，仲用「奇怪（strange）」嚟形容國安法入面指定法官嘅條文，但就畀建制派議員批評佢嘅說法「不恰當」同「有誤導成份」。
李八方